POLÍTICA LOCAL

O PSOE de Xinzo propón doar as dietas dos dous últimos plenos

Estas sesións convocáronse para tramitar o nomeamento do novo alcalde da vila, Manuel Cabas, e para dar conta das atribucións do novo equipo de goberno

La portavoz socialista, Elvira Lama, durante el pleno de investidura de Cabas.
La portavoz socialista, Elvira Lama, durante el pleno de investidura de Cabas.
O PSOE de Xinzo propón doar as dietas dos dous últimos plenos

O grupo socialista de Xinzo rexistrou esta semana unha moción para doar a dúas asociacións -Limisi e Algaria- as retribucións percibidas polos edís das distintas formacións que compoñen a Corporación municipal durante os últimos dous plenos extraordinarios -uns 4.000 euros netos- . Estas sesións convocáronse para tramitar o nomeamento do novo alcalde da vila, Manuel Cabas, e para dar conta das atribucións do novo equipo de goberno. 

A portavoz do PSOE limiao e deputada provincial, Elvira Lama, explicou que "esta doazón é un acto de responsabilidade ante un goberno do PP absolutamente desnortado que, para colmo, nos está a custar máis cartos dos que debería, sen proveito algún". Nesta liña, a representante municipal manifestou que "os veciños e veciñas de Xinzo non están para pagar as festas e desfeitas do Partido Popular. Os seus problemas internos están a custarlle á vila moitos fondos públicos sen que eses euros redunden no seu beneficio, nin tampouco nos servizos que se lle prestan". 

Os socialistas recordan que, salvo un que ten adicación exclusiva a tempo completo e, polo tanto, un salario fixo mensual -Ricardo Sieiro-, todos os edís cobran estas dietas -150 euros brutos cada pleno- por asistencia ós órganos colexiados municipais, polo que a doazón "sería o mellor xesto que toda a corporación local de Xinzo podería facer en beneficio da vila e ante o bochorno público ó que estamos a asistir durante os últimos meses". A iniciativa pide que esta doazón se execute coa maior brevidade posible. Durante este mes de agosto, o Concello de Xinzo xa celebrou tres sesións extraordinarias "a causa do xogo de tronos e dos problemas internos do PP local".