Fixan como principal debilidade a falta de maiores competencia no eido dixital
Un grupo de expertos do sector turístico puxo de manifesto onte a necesidade de que o sector turístico galego amplie as súas competencias no marco do marketing dixital. Deste xeito, ademais de poñer por riba da mesa as debilidades que presenta na actualidade, tamén salientaron o potencial de crecemento que presenta.
Así o concluíron no transcurso da xornada organizada polo grupo Colmeiro e a Deputación de Ourense na Casa dos Poetas, facéndoa coincidir co Día Mundil do Turismo. Alí, tanto o vicepresidente do organismo provincial, Rosendo Fernández, como o alcalde de Celanova, José Luis Ferro, explicaron os proxectos de colaboración entre as dúas entidades nesta materia, que pasan polo eido das novas tecnoloxías e que inclúen iniciativas como a creación dun videoxogo basado no libro Arnoia, Arnoia, de Xosé Luís Méndez Ferrín. Xunto a eles estivo o coordinador do grupo Colmeiro e catedrático de Facenda na Universidade de Santiago, Luis Caramés, lembrando a necesidade de que as administracións se impliquen no desenvolemento de novas ferramentas aplicadas ó sector turístico.
As ponencias da xornada correron a cargo de expertos en diferentes campos. En primeiro lugar, o profesor de Marketing Dixital da USC José Manuel Porto falou sobre o comportamento do usuario en internet, resaltando a idea do "Internet das cousas". Tras del, tanto Roberto Fraga de Pilgrim (empresa dedicada ó Camiño de Santiago), como Verónica Ramallal de Pekecha lembraron que o futuro do sector pasa por ofrecer experiencias polo que se torna fundamental coñecer ó cliente así como os seus gustos e hábitos. Xa por último, Ana Pérez de Redegal explicou como adoitan os usuarios planificar as súas viaxes advertindo que Galicia está quedando atrás no emprego das ferramentas de marketing.
