Seis persoas falan sobre a situación do galego e sobre a protección que se lle da.
David Gallego (Perruqueiro, Seixalbo)
Na miña opinión, debería de usarse máis a lingua galega tanto en actividades, como nas escolas e nos traballos.
Considero que é moi importante que a lingua galega avance máis en todos os sitios e en todos os sectores laborais.
Sería unha pena que a nosa lingua se fose perdendo paulatinamente e deberiamos contribuír todos dándolle un pouquiño máis de uso.
Ademáis debería ter máis protección por parte das institucións, porque nótase que a nosa lingua está perdendo moitos falantes e cada vez fálase menos. Parece que só queda nas aldeas.
Sandra García (Enfermeira, Ourense)
Creo que a lingua galega está suficientemente protexida no ámbito do ensino, sobre todo nos centros educativos. Pero iso quizáis non sexa suficiente para garantir que perviva.
Tamén considero que se debería fomentar o seu emprego nas institucións públicas.
Dende a administración galega debería dárselle moito máis valor, xa que é a lingua orixinaria do noso pobo e temos a obriga de protexela.
Tamén coido que deberiamos contribuír todos os cidadáns un pouquiño máis a que se estimule máis o seu uso no ámbito privado e familiar.
Antonio García (Xubilado, Viladerrei)
A miña opinión sobre a lingua galega é que, sobre todo, existe unha necesidade imperiosa en que seca moito máis potenciada no ámbito do ensino.
Tamén considero que as institucións galegas deberían protexela con máis intensidade e potenciar o seu uso, algo ao que temos que contribuír os cidadáns e todos os políticos dos diferentes partidos.
Penso que só desta maneira, potenciándoa e garantizando os dereitos dos falantes poderase seguir falando con normalidade, e esa normalidade será moi positiva para Galiza en tódolos aspectos.
Óscar Rodríguez (Fontaneiro, Ourense)
Eu estou convencido de que a lingua galega precisa de máis protección e apoios por parte dos nosos políticos e gobernantes, ao igual que fan en Cataluña e máis no País Vasco.
Deberíase potenciar máis nas escolas e nos organismos oficiais do ámbito galego.
Mesmo considero que se debe seguir como se estaba facendo ata hai pouco, que non sei se segue vixente, de darlle unha pequena axuda a aquelas familias que poñan o nome dos seus fillos e fillas na nosa lingua.
Esa é a liña que debería seguir o Goberno.
Víctor Feijóo (Empresario, Ourense)
A miña opinión sobre o galego é que considero que nos últimos anos o avance do galego foi a máis. Ségueselle dando pouca importancia e non continúa a protección que dende as institucións considero que se lle debería dar.Segue sendo unha lingua menor e un idioma pouco valorado, está considerada a lingua da xente inculta. Creo que o español segue a ser percibido como a lingua da xente culta. Dende as institucións deberían darlle outra importancia e outro valor mediante subvencións, por exemplo. Forma parte do noso patrimonio.
Rochi Nóvoa (Mestra de inglés, Vilardevós)
A verdade é que temos unha lingua moi bonita, herdanza dos nosos ancestros. Baixo ningunha premisa podemos permitir que nola neguen e deixar que sigan querendo eliminala. Á lingua debémoslle unha identidade, expresións... Lamentablemente o señor Feijoo quitou hai uns anos aquela lei que lle daba o seu lugar ao galego na aula. O profesorado deberiamos falar a lingua que escolleran os pais para os seus fillos segundo esa lei. Pero eu seguireina incumprindo. Eu falo moitos idiomas, pero uns non quitan aos outros.
