O valor do material incautado podería superar os 60.000 euros no mercado negro
A Garda Civil detivo catro persoas pola súa presunta vinculación cunha organización que se dedicaba á distribución de substancias anabolizantes que operaba a nivel internacional e que estaba radicada en Vigo.
Os arrestados dentro da denominada "Operación Adonis", desenvolvida pola Policía Xudicial da Garda Civil de Cambados e dirixida polo Xulgado de Instrución 3 de Vigo, son R.G.R., I.S.M., G.O. e A.C.O., de 47, 42, 26 e 19 anos, respectivamente.
A todos eles se lles imputa un suposto delito contra a saúde pública, informaron fontes do instituto armado.
Nos diversos rexistros practicados, a Garda Civil incautouse de "gran cantidade" de anabolizantes, algúns deles de uso veterinario.
Trátase de substancias e medicamentos como clenbuterol, anapolon, trenbolona ou oxitosona.
Tamén foron intervidos "multitude" de envases de hormona de crecemento, soportes informáticos, teléfonos móbiles e unha "importante cantidade" de diñeiro en efectivo, relata a Garda Civil nun comunicado.
O valor do material incautado podería superar os 60.000 euros no mercado negro.
Os detidos están relacionados co mundo do culturismo, algún deles cun importante palmarés a nivel nacional e internacional nesa disciplina.
A Garda Civil fai fincapé en que o uso destas substancias pode chegar a pór en perigo a vida de quen as consuma sen a preceptiva receita e supervisión médica.
