Axentes do Corpo Nacional de Policía da Comisaría de Vigo detiveron a un novo de 30 anos de idade, de nacionalidade peruana e veciño da cidade, como presunto autor dun delito contra a seguridade do tráfico, ao circular nun coche a gran velocidade e baixo os efectos do alcohol.
A detención produciuse a raíz de varias chamadas de testemuñas que alertaban da presenza dun condutor, a pasada madrugada, que circulaba polas zonas de praias do Vao e de Samil a grande velocidade, en dirección ao centro de Vigo, invadindo continuamente o carril contrario e "xerando continuas situacións de risco".
A Policía despregou un dispositivo de busca e localizou o condutor na rúa Torrecedeira, circulando a máis velocidade da permitida nesa vía. Tras darlle o alto, os axentes comprobaron que o rapaz presentaba claros síntomas de estar baixo a influencia de bebidas alcohólicas.
Ao ser sometido a unha proba de alcoholemia, o condutor deu un resultado de máis do triplo da taxa permitida, polo que o seu coche foi inmobilizado e o rapaz detido. Unha vez en Comisaría comprobouse que carece de antecedentes policiais. O arrestado e as actuacións practicadas foron postas a disposición do Xulgado de Instrución número 2 de Vigo.
