A Delegación do Goberno en Galicia destacou que esta campaña ten unha especial transcendencia na Comunidade galega debido á "grande extensión de rutas de transporte escolar existentes"
A Dirección Xeral de Tráfico (DGT) porá en marcha a partir deste luns e durante toda a semana, unha campaña especial de vixilancia e control do transporte escolar e de menores. Nela, comprobarase que tanto autobuses como condutores cumpran coa normativa, que inclúe, entre outras obrigas, a necesidade de que os menores vaian acompañados por unha persoa debidamente cualificada nos desprazamentos.
Nun comunicado, a Delegación do Goberno en Galicia destacou que esta campaña ten unha especial transcendencia na Comunidade galega debido á "grande extensión de rutas de transporte escolar existentes" e, nesta, están invitados a participar os concellos que teñen policía local, para reforzar o seu seguimento.
Deste modo, aínda que a vixilancia por parte da Agrupación de Tráfico da Garda Civil é "permanente", nos próximos días intensificaranse os controis preventivos para concienciar pais, responsables educativos e condutores da necesidade de cumprir as normas establecidas con respecto a este tipo de transporte.
Estas normas abranguen o apartado administrativo (sobre todo autorizacións e documentos que deben ter os autobuses e condutores para a correcta prestación do servizo) e as condicións técnicas e elementos de seguridade do vehículo.
SEGURIDADE E MENORES
De acordo coas estatísticas da DGT, o 90% dos accidentes que se producen durante o transporte escolar teñen lugar no momento de subir ou baixar do vehículo, ou xusto nos instantes inmediatos, e en moitos casos trátase de atropelos causados por unha distracción do menor, do condutor do transporte escolar, ou dos pais.
En todo caso, as cifras de sinestralidade mostran que o sector do transporte escolar é un sector seguro. Así no ano 2013 non se produciu ningunha vítima mortal entre os usuarios de autobuses escolares de toda España. Pola súa banda, o número de feridos graves pasou de 5 a 1, e os feridos leves baixaron de 55 a 19, en relación ao ano 2012.
