A directora de Turismo de Galicia, Nava Castro marca como obxectivos para este ano aumentar o turismo "de calidade", a estancia media e a rendibilidade
Máis de 76.500 visitantes pasaron polo expositor de Galicia ao longo da 38ª edición da Feira Internacional de Turismo (Fitur), celebrada en Madrid na última semana, o que supón 1.000 máis que en 2017 e un "máximo histórico de afluencia".
Diso informou este luns a directora de Turismo de Galicia, Nava Castro, nunha rolda de prensa na que fixo balance dunha edición na que o posto galego tivo "máis visitantes que nunca".
Durante estes días realizáronse 43 presentacións no expositor de Galicia, 13 actos máis que na anterior edición, repartíronse máis de 200.000 folletos e contouse coa presenza de 250 xornalistas e blogueiros.
No posto de Galicia, de máis de 1.000 metros cadrados, estiveron representados todos os entes provinciais e locais da Comunidade, así como o sector a través do Clúster de Turismo de Galicia. Por esta caseta pasaron personalidades como os Reis, o titular do Goberno galego, Alberto Núñez Feijóo, e a presidenta do Congreso, Ana Pastor.
Todo iso nunha feira que, en cifras xerais tamén alcanzou o seu maior número de asistentes, cuns 251.000, e contou con 10.000 empresas.
"Misión cumprida"
Por iso, Nava Castro sinala que "a misión foi cumprida", xa que Galicia "consolídase como un dos principais reclamos turísticos e culturais de España".
Nesta liña, a responsable de Turismo de Galicia remarca que se alcanzaron os obxectivos de promocionar á Comunidade como destino "de calidade", "sustentable" e "desestacionalizado".
"Víase na propia feira o `stand` que máis movemento tiña, que esperemos que sexa un reflexo a nivel nacional, era o noso `stand", resumiu Nava Castro.
Tamén no marco de Fitur, a Xunta recibiu dous premios que outorga esta cita. En concreto, a Comunidade alzouse co galardón ao mellor posto na categoría de institucións e comunidades autónomas e ao mellor produto de turismo activo polas súas experiencias nos parques naturais, unha nova oferta impulsada pola Consellería de Medio Ambiente e por Turismo de Galicia.
Obxectivos para 2018
A preguntas da prensa sobre o obxectivo de superar en 2018 os 5,3 millóns de turistas, Nava Castro respondeu que "máis que o número" de visitantes, o que se buscará é traballar por aumentar o turismo "de calidade", así como incrementar a "estancia media" e a "rendibilidade".
E é que Galicia aspira a ter turistas durante "todo o ano", que en palabras de Nava Castro "é o importante", para o que se está "traballando para poder desestacionalizar" con "novos produtos" como `Escenarios ao volante` ou `Galicia surfing`.
Volta a niveis "precrisis"
Así mesmo, levaron a cabo unhas 350 entrevistas con profesionais impulsadas polo Clúster de Turismo de Galicia, as cales foron un 90% a nivel nacional e o resto internacionais (con presenzas de Colombia, México, Francia e Portugal, entre outros).
Polo visto nesta edición de Fitur, o presidente do Clúster de Turismo de Galicia, Francisco González, asegurou que: "Volvemos situarnos en niveis precrisis". Destaca que nesta edición houbo "moitísima actividade" e cre que se conseguiu un "bo resultado".
