O home quedara inconsciente e nun primeiro momento pensouse que quedara atrapado debido ao golpe pero, finalmente, conseguiu saír sen necesidade de ser excarcerado
Os servizos sanitarios de urxencias trasladaron na tarde deste domingo ao condutor dun vehículo e a unha nena que resultaron feridos tras saírse da vía o vehículo no que viaxaban, na estrada que une Salvaterra de Miño con Ponteareas, á altura da parroquia de Fornelos.
Segundo informa o 112 Emerxencias Galicia, o sinistro produciuse ás 15,40 horas, provocando a alarma dos veciños, que foron os que alertaron ao servizo de emerxencias.
O condutor quedara inconsciente e nun primeiro momento pensouse que quedara atrapado debido ao golpe pero, finalmente, conseguiu saír sen necesidade de ser excarcerado.
No interior do vehículo viaxaba unha nena, que foi a primeira en ser sacada do vehículo e que tamén precisou asistencia médica. A perda da consciencia do condutor motivou que os servizos sanitarios de urxencia valorasen mobilizar o helicóptero con base en Ourense. Con todo, a recuperación paulatina do home permitiu a súa evacuación en ambulancia.
Ao lugar acudiron os profesionais de Urxencias Sanitarias, ademais de axentes da Garda Civil de Tráfico e os efectivos do Servizo de Prevención, Extinción de Incendios e Salvamento do Baixo e Ponteareas.
Ferido nun accidente en Vigo
Por outra banda, ao redor do catro da tarde, produciuse outra saída de vía na AP-9 ao seu paso por Cabral, en Vigo. Segundo a información facilitada ao 112 Galicia, o vehículo caeu por un desnivel e o seu ocupante resultou ferido. Até o lugar desprazáronse profesionais de Urxencias Sanitarias e informouse aos bombeiros de Vigo, aínda que a persona estaba liberada e accesible.
