Trátase dunha obra que conta cun orzamento base de licitación que ascende a case 171 millóns de euros
O Ministerio de Fomento publicou hoxe no Boletín Oficial do Estado (BOE) a aprobación definitiva do estudo informativo da autovía A-72 entre Monforte de Lemos e Chantada, unha obra que conta cun orzamento base de licitación que ascende a case 171 millóns de euros.
A nova autovía, que comprende un trazado de case 37 quilómetros, conectará a Nacional 120 nas proximidades de Monforte de Lemos coa futura autovía Lugo-Ourense (A-56), nos arredores da localidade de Chantada.
O trazado, que discorre polos municipios de Monforte de Lemos, Pantón, O Saviñao e Chantada, aproveitará o trazado da vía rápida autonómica CR-62-1 "como unha das calzadas da futura autovía", explica Fomento nun comunicado, "para evitar no posible o impacto ambiental" sobre o territorio.
Por outro lado, tamén se evita a afección a destacados elementos patrimoniais, como os arredores da igrexa de Santo Estevo de Ribas de Miño, mediante un viaduto de 670 metros de lonxitude sobre o río Miño e un túnel dobre de 1.488 metros.
