Esperan atrasos na liña porque os trens terán que reducir a súa velocidade no punto onde se produciu o incidente
Un incendio rexistrado este mércores na locomotora do Tren Hotel que percorre o traxecto entre Barcelona e Vigo obrigou a manter cortada varias horas a liña de AVE Madrid-Barcelona e ocasiona atrasos no tráfico ferroviario.
O suceso tivo lugar ás 22.16 horas á altura da localidade de Ballobar (Huesca), cando o "primeiro boggie da locomotora" do Tren Hotel, no que viaxaban 240 pasaxeiros, sufriu un "sobrequentamento e incendio" quedando detido "sen tensión na catenaria" e sen que se producise ningún ferido.
"Unha máquina diesel remolcou o tren ata Ballobar e dende alí habilitáronse autobuses ata Zaragoza, onde os viaxeiros continuarán ata destino cun tren S-121", explicou Renfe nunha nota.
Ademais, "por orde dos bombeiros" durante a incidencia quedou interrompida a circulación da liña de Alta Velocidade por ambas as dúas vías entre Zaragoza e Lleida.
Debido a esta incidencia, un tren AVE Madrid-Barcelona, con 250 pasaxeiros a bordo quedou detido no lugar sen tensión e foi remolcado ata unha zona electrificada para continuar o seu traxecto ata Barcelona.
En cambio, en sentido contrario, o tren AVE Barcelona-Zaragoza, quedou estacionado en Lérida Pirineos dende onde os 80 pasaxeiros continuaron por estrada a súa viaxe. Renfe abriu unha investigación para determinar as causas do incidente.
APERTURA DA LIÑA
A primeira hora deste xoves Renfe reabriu a liña de AVE Madrid-Barcelona. Segundo informaron fontes da operadora a Europa Press, os primeiros trens que partiron dende Madrid e Barcelona fixérono co horario previsto.
Iso si, dende Renfe avisan de que esperan atrasos nos trens que percorren o traxecto porque terán que reducir a velocidade ata 80 km/h no punto onde se produciu o incidente.
