O alcalde da Coruña trasládalles o seu apoio e anuncia a presentación dunha moción no próximo pleno
O Movemento Galego en Defensa das Pensións Públicas (Modepen) convocou para o 22 de febreiro concentracións nunha decena de localidades galegas en contra da subida do 0,25% das pensións, que consideran "un insulto".
Así se manifestou o secretario desta organización, Gonzalo Balo, após reunirse representantes deste Movemento co alcalde da Coruña, Xulio Ferreiro. No encontro, celebrado no Consistorio coruñés, o rexedor trasladoulles o apoio ás súas reivindicacións.
Tamén avanzou que, se a súa axenda o permite, acudirá á concentración convocada este xoves, ás 12,00 horas, no Obelisco. Á mesma hora, celebrarase noutras localidades galegas como Lugo, Noia (A Coruña), Vigo ou Pontevedra. Noutras cidades como Santiago será ás 20,00 horas.
"Pensións no futuro"
Estas concentracións terán lugar no marco da protesta convocada pola Coordinadora Estatal en Defensa do Sistema Público de Pensións, da que forma parte Modepen.
"Loitamos polas pensións actuais, pero sobre todo polas do futuro", sinalou o secretario desta organización, quen acusou ao Goberno de buscar que os cidadáns se fagan plans de pensións privados. Na mesma liña, cuestionou que o sistema de pensións estea en risco.
Mentres, o alcalde explicou que Marea Atlántica presentará no próximo pleno municipal unha moción pedindo, entre outras cuestións, que se "revaloricen" as pensións.
