O portavoz da empresa concesionaria, Benito García, subliñou que a cantidade de lixo retirado das rúas, "sen ser espectacular", é "importante"
A primeira quenda de traballadores de Urbaser que cumpriu o novo decreto de servizos mínimos ditado polo Concello de Lugo nesta mesma semana retirou na pasada noite das rúas da cidade un total de 54 toneladas de lixo, segundo informou a propia empresa concesionaria.
Ao determinar o Concello de Lugo uns servizos mínimos de cen por cento, precisamente para facer fronte ás alertas sanitarias decretadas polo servizo de Control de Riscos Ambientais da Xunta de Galicia, nesa primeira quenda de noite-madrugada incorporáronse ao traballo oito operarios e seis condutores do cadro de persoal.
O portavoz da empresa concesionaria, Benito García, subliñou que a cantidade de lixo retirado das rúas, "sen ser espectacular", é "importante", especialmente "se se mantén durante os próximos días de traballo".
O cadro de persoal continúa hoxe a cumprir os servizos mínimos e nesta mañá incorporáronse á súa quenda un total de 47 traballadores, para a recollida do lixo e a limpeza de rúas.
