O voceiro parlamentario do PSdeG, José Luis Méndez Romeu, dixo que os presupostos "non abordan o crecemento produtivo nin a protección social necesaria"
O voceiro parlamentario do PSdeG, José Luis Méndez Romeu, denunciou que os presupostos da Xunta para 2015 "lonxe de situar" á Comunidade "na senda da recuperación económica consolidan un modelo no que Galicia crece menos que España", no que "Galicia non vai saír pronto da crise", lamentablemente", por iso anunciou que o seu grupo vai presentar unha emenda á totalidade.
En declaracións aos medios nos corredores do Parlamento galego tras a presentación das contas por parte da Xunta, Méndez criticou que son uns presupostos que "non abordan o crecemento produtivo nin a protección social necesaria", cos que mostrou a súa "fonda desconformidade".
Por iso, Méndez Romeu censurou que "por sexto ano consecutivo" a Xunta "non está preocupada polas condicións de vida dos galegos, e soamente por unha actuación continuista de carácter burocrático de costas ás necesidades do crecemento real".
Nesta liña, contradixo o presidente da Xunta, Alberto Núñez Feijóo, xa que mentres destaca crecemento nas contas para 2015, segundo o PSdeG, hai unha baixada de 500 millóns de euros respecto ao ano anterior.
Sen prioridades dos cidadáns
Preguntado sobre o feito de que suba máis o presuposto dedicado a Vicepresidencia e a Consellería de Presidencia, Administracións Públicas e Xustiza que ás denominadas consellerías sociais, recriminou que "o Goberno non ten as prioridades que demandan os cidadáns", pois "os grandes servizos públicos sofren unha deterioración continuada dende a chegada do Partido Popular ao Goberno e iso vaise incrementar no ano 2015".
"Por a contra, si que están a subir os gastos de funcionamento da propia Administración, nunha situación paradoxal porque non está a crear emprego, nin investimentos produtivos", lamentou.
Tamén censura que os novos beneficios fiscais se limitan a unha "mínima cifra" de tres millóns de euros, coincidindo ademais cun incremento notable do IRPF, IVE e IBI.
