O conselleiro de Economía e Industria, Francisco Conde, puxo como exemplo de empresa a Netex "sendo unha mostra clara de emprendemento, innovación, e internacionalización"
O conselleiro de Economía e Industria, Francisco Conde, destacou hoxe na súa visita á empresa Netex a importancia de facer que "a innovación" sexa a "cultura" das compañías.
Conde puxo a esta compañía coruñesa como exemplo de empresa que fai da "innovación a súa cultura", o que lle permite competir nun "mercado internacional moi competitivo" como é o de sistemas de "e-learning".
"Netex leva xa dez anos desenvolvendo a súa actividade na Coruña, sendo unha mostra clara de emprendemento, innovación, e internacionalización", subliñou o conselleiro sobre a empresa con presenza en vinte e sete países.
Netex ofrece unha solución integral ás necesidades das empresas no ámbito da formación corporativa mediante o desenvolvemento de tecnoloxías innovadoras de "learning".
Esta solución permite, a través de varias ferramentas, a creación, distribución e xestión da formación dixital, incluíndo todo o software necesario para a súa xestión ben a través do catálogo ou ben feitos a medida para grandes compañías multinacionais ou pequenas empresas.
Nos últimos anos, a compañía posicionouse ademais no mundo editorial e no sector educativo, facilitando o desenvolvemento e acceso aos produtos a través de aplicacións móbiles.
"Hoxe, medio millón de mozos e miles de traballadores de importantes multinacionais fórmanse grazas aos produtos dun grupo de emprendedores coruñeses", resalta Conde a través dun comunicado.
Desde a Xunta a través de XesGalicia apoian "unha actividade innovadora, competitiva, e que está permitindo exportar coñecemento desde Galicia".