MONTERREI

O castelo conservará o acceso Norte co pavimento orixinal


Patrimonio anuncia un investimento duns 350.000 euros para unhas obras que durarán un ano

María del Carmen Martínez, directora Xeral de Patrimonio, visitou no mes de febreiro a fortaleza.
María del Carmen Martínez, directora Xeral de Patrimonio, visitou no mes de febreiro a fortaleza.
O castelo conservará o acceso Norte co pavimento orixinal

Xa se conoce a solución que dende o departamento de Patrimonio Cultural da Xunta de Galicia se adoptou para solucionar o problema que se deu no acceso Norte á fortaleza de Monterrei. O conselleiro de Cultura, Educación e Ordenación Universitaria, Román Rodríguez, explicou onte no Parlamento de Galicia que a decisión tomada ao respecto é a de compatibilizar o tráfico rodado e peonil coa conservación do pavimento orixinal, achado no marco dunhas obras de reurbanización e tendido de instalacións urbanas no ano 2016, logo de que a Dirección Xeral do Patrimonio Cultural asumira a escavación arqueolóxica e os traballos de recuperación, conservación e posta en valor deste pavimento orixinal.

Foi entón cando se atopou o Camiño Real que agora se pretende preservar e que propiciou o parón nas obras de rehabilitación dos accesos e mesmo o peche da instalación hoteleira no interior do Castelo de Monterrei.

Segundo confirmou o propio conselleiro no Parlamento de Galicia, adoptouse a decisión de compatibilizar o tráfico e a conservación da calzada histórica. Para iso, rematarase a obra en execución tapando de forma provisional con terra compactada os tramos de pavimento de pedra da calzada orixinal, que polo seu estado non permiten a circulación de tráfico rodado.

Este paso será previo á redacción dun proxecto de reparación, conservación e rehabilitación do pavimento orixinal da rúa co obxectivo de acondicionala para o tráfico peonil e rodado, garantindo a conservación dos seus valores culturais, unha obra que suporía un investimento duns 350.000 euros e que podería estar lista nun prazo aproximado de 12 meses.


Mellora da outra vía


De forma paralela e para garantir o acceso rodado ao Castelo mentres non se executen as devanditas obras de rehabilitación no Camiño Real, mellorarase a vía alternativa do tramo Sur da rúa principal, a que accede polo hospital da Trinidade. Estes traballos, que terán unha duración aproximada de dous meses, consistirán na mellora das rasantes, peraltes e capas de rodadura; construción de valos e varandas de protección sobre desniveis; ampliación dos radios de curvatura, e instalación de alumeado de balizamento e de elementos de regulación do tráfico.