Unha brigada de catro operarios traballa no desbroce do tramo final, entre A Fraga e O Barón
O acondicionamento dos 17 quilómetros de sendeiros que integran o Camiño dos Arrieiros no Carballiño está a piques de rematar, xa que tan só falta por desbrozar un dos tramos finais, entre as parroquias de Sagra e O Barón. Concretamente, o sendeiro de aproximadamente dous quilómetros que, cruzando o regato que divide as dúas feligresías citadas, enlaza A Fraga cos núcleos de Fonteantiga e San Fiz. "Ademais das tarefas de desbroce, vaise deixar ó descuberto o pavimento de pedra do camiño de Fonteantiga e arranxar a ponte sobre o regato", comenta a concelleira de Medio Rural, Rosario González.
É precisamente este departamento municipal quen desenvolve, dende mediado o pasado mes de maio, esta iniciativa de limpar a antiga ruta que utilizaban na Idade Media os colleiteiros do Ribeiro para transportar os seus viños ata Santiago de Compostela, atravesando as parroquias carballiñesas do Barón, Sagra, Partovia e Mesego. Unha encrucillada de sendeiros que foi inaugurada hai 10 anos, tras un investimento de 2,3 millóns de euros na súa recuperación por parte do Ministerio de Medio Ambiente.
Unha brigada composta por catro operarios é a encargada de executar os traballos actuais de desbroce ó traverso dun convenio de colaboración social entre o Concello do Carballiño e o Inem para persoas desempregadas. "O periodo de vixencia do convenio remata o vindeiro 15 de setembro, e confiamos en poder renovalo para realizar outras obras no rural do municipio", apunta Rosario González.
Este grupo de traballadores tivo que enfrentarse a varias dificultades nos últimos tres meses e medio, "xa que había tramos da ruta completamente afogados pola maleza e tamén moitos muros derrubados, coma foi o caso da antiga aldea do Corval", lembra a edil socialista. Neste sentido, houbo que recurrir ó manexo de tractores para deixar expeditas as zonas máis complicadas de limpar e que levaban anos sen nengún tipo de mantemento. Por outra banda, a mesma brigada tamén se encarga do arranxo e da reposición dos carteis que sinalizan a ruta, alguns deles destrozados por actos vandálicos.
Rosario González amosou a súa satisfacción polo próximo remate deste proxecto de acondicionamento, "tendo en conta que son moitos os veciños e tamén os visitantes que percorren o Camiño dos Arrieiros durante todo o ano". Ademais, dende o propio Concello e o colectivo veciñal de Partovia promóvense percorridos en primavera e outono.
