20 persoas participan no proxecto, cunha idade comprendida entre 21 e 55 anos e un grao de discapacidade recoñecido de máis do 33%
A Asemblea Comarcal de Cruz Vermella no Carballiño leva a cabo desde xaneiro do 2016 un proxecto específico de apoio a persoas con capacidades diferentes, co financiamento do Fondo Social Europeo e a colaboración da Asociación Aspadisi, así como dos servizos sociais do Carballiño. En total, 20 persoas participan no proxecto, cunha idade comprendida entre 21 e 55 anos e un grao de discapacidade recoñecido de máis do 33%.
Desde a posta en marcha deste proxecto, organizáronse diferentes accións para potenciar as capacidades básicas dos participantes, tanto persoais como sociais, co obxectivo de aumentar a súa autonomía e mellorar a súa calidade de vida e a das súas familias.
A técnica responsable, María África Lavandeira, explica que “os obradoiros realizados abarcaron temáticas e habilidades moi diversas: canto, teatro, habilidades sociais, improvisación, novas tecnoloxías, igualdade de xénero, actividades vinculadas ao mundo rural...Esta ampla variedade de actividades fixo que o grupo fortalecera os lazos afectivos entre os participantes e o voluntariado", segundo apunta.
