Unha sesión vermú con Rufus T.Firefly ou Silvia Superstar completan o cartel
Vanse coñecendo os detalles da "gran cita das vangardas musicais", coma a definiu o presidente da Diputación, Manuel Baltar. Onte tocou a parte musical da semana das industrias culturais e creativas de Ourense, que se celebrará entre o 2 e o 5 de maio. Xunto a Baltar, Juan Rivas e Manuel Araújo, coordinadores da ICC Week, encargados de presentar a programación musical. Hai tres citas: Morgan, Mikel Erentxun e unha sesión de día amenizada por Rufus T. Firefly, entre outros, que Araujo bautizou como "a mellor hora vermú do mundo". Trátase de grupos que, coma remarcaron, están triunfando a nivel nacional e internacional e que forman parte dos carteis de festivais coma o BBK de Bilbao ou O Son do Camiño, con casa en Santiago de Compostela.
Os escenarios, un ano máis, serán enclaves históricos e patrimoniais da cidade. Morgan e Erentxun pasarán polo Teatro Principal os días dous e catro e maio, respectivamente. Dos primeiros, Rivas asegurou que "son un dos mellores grupos nacionais que se poden ver en vivo na actualidade" e, ademais, "non é preciso coñecelos para ir velos ; hai que deixarse levar para vivir un fantástico momento de música pop en directo". Piropos tamén para o líder de Duncan Dhu: "Pouco hai que dicir de Erentxun dado que a súa traxectoria fala por si mesma" e que desde a ICC Week consideran da familia "porque é un gran representantes das industrias culturais e creativas". As entradas estarán dispoñibles a partir de mañá no propio teatro.
marca ourensá
A terceira data a recordar é o cinco de maio, cunha festa de día no corazón da cidade, os xardíns do Padre Feijóo. Rufus T. Firefly, referente do rock alternativo, estarán acompañados por Esposa, que nas súas filas contan con dous ourensáns, e que están a triunfar co seu "pop divertido e alegre", sinalou Araújo. Tamén nesta sesión estarán Bifannah, vigueses afincados en Madrid e Londres, que a semana que vén comezarán a súa xira por EEUU. O peche será cousa de Silvia Superstar, cunha sesión dj coa que culminará a xornada, que será gratuíta.
