UNIVERSITAS

O Campus da Auga contará cun edificio operativo en 2017

Universidade e Xunta asinaron un convenio por un importe de 4,5 millóns

Jesús Vázquez Abad, na sinatura do convenio xunto con Salustiano Mato.
Jesús Vázquez Abad, na sinatura do convenio xunto con Salustiano Mato.
O Campus da Auga contará cun edificio operativo en 2017

Paso definitivo para facer realidade o Campus da Auga. Universidade de Vigo e Xunta de Galicia asinaron en Ourense un convenio de colaboración para a construción e desenvolvemento do edificio que albergará a sede e as instalacións deste campus de especialización, un centro de preto de 3.600 metros cadrados que se construirá na parcela situada entre a piscina e o Edificio Xurídico-Empresarial na zona sur do campus de Ourense. En total, un investimento de 4,5 millóns de euros para un edificio que contará con 1.000 metros cadrados de laboratorios e plantas piloto con equipamento específico nos que dar acubillo aos 40 grupos con 341 investigadores que xa están a desenvolver as súas liñas de traballo arredor da temática da auga. O centro albergará ademais a sede corporativa do Campus da Auga, o centro de supercomputación, aparcadoiro e 900 metros cadrados dedicados a usos xenéricos, como reunións ou intercambios empresariais.

Coa sinatura deste convenio ponse fin a unha etapa iniciada en 2012 e que agora continúa cos traballos preparatorios para que en 2015 estea finalizado o proxecto de construción, que sairá a concurso o vindeiro ano e co que se espera ter rematadas as obras en 2017. “Deste xeito acaba o proceso co que se iniciaba un camiño de futuro prometedor non só para o campus de Ourense, senón para a cidade e a provincia”, asegurou Salustiano Mato, reitor da Universidade de Vigo.