Laura Ruiz acadou un premio do colexio profesional galego
Os centros con estudos de Educación Social das tres universidades galegas e o Colexio de Educadoras e Educadores Sociais de Galicia celebraron o Día Mundial da Educación Social organizando diferentes actividades que tiveron como obxectivo visibilizar e valorizar a súa profesión e o seu papel na sociedade. O campus de Ourense uniuse a esta celebración cun acto no que a alumna de doutoramento Laura Ruiz recibiu un premio outorgado pola entidade colexial en colaboración coas universidades galegas polo seu traballo fin de grao sobre os novos retos e saídas profesionais deste colectivo no campo da saúde.
Laura Ruiz gañou o 2º Concurso de Traballos Fin de Grao (TFG) Arredor da Educación Social na modalidade de Educación Social Escondida, destinada a aqueles TFG que tratan novos ámbitos de proxección profesional ou metodoloxías novidosas e inclusivas. O seu traballo, titulado A educación social no campo da saúde. Novos retos e saídas profesionais, foi dirixido polo docente José María Faílde. “A investigación tivo tres obxectivos: indagar nos sectores concretos da saúde nos que actualmente interveñen os educadores sociais; identificar os factores que facilitan e dificultan a participación destes profesionais no ámbito da saúde e examinar en que situación se atopa actualmente a inclusión da educación social no ámbito da saúde nas diferentes comunidades autónomas”, explicou a investigadora ourensá.
