Na competición promóvese o xogo limpo e castigan a falta de deportividade
O programa Ligas universitarias que organiza o Servizo de Deportes está dirixido a persoas da comunidade universitaria e inclúe un amplo abano de modalidades deportivas, que varían nos tres campus da Universidade. Con estas propostas o que se busca é dar resposta ao interese polos deportes de equipo ao tempo que se busca fomentar valores como a deportividade ou o compañeirismo. O regulamento destas ligas destaca especialmente por incluir un sistema de puntuación Fair Play, promovendo así o xogo limpo e castigando a falta de deportividade.
Entre os tres campus, tomaron parte na fase previa das ligas 202 equipos, dos que 117 corresponden ao campus de Vigo: 14 de baloncesto masculino, 2 de balonmán mixto, 6 de fútbol sala feminino, 50 de fútbol sala masculino, 41 de fútbol sete e 4 de voleibol; 31 equipos corresponden ao campus de Pontevedra: sendo 4 de boleibol mixto, 11 de fútbol sala, 11 de fútbol sete, 3 de baloncesto masculino, 1 de balonmán feminino e 1 de fútbol sala feminino; e 54 son os equipos do campus de Ourense: 30 de fútbol sala, 20 de fútbol 7 e 4 de baloncesto. Todos estes equipos están actualmente participando nas ligas correspondentes de cada campus, fase previa á Fase Final Intercampus que este curso se disputará os días 26 e 27 de febreiro no Campus de Pontevedra. n
