O músico e escritor participou na conmemoración do Día do Poesía en Ciencias da Educación e do Deporte
nDos cancioneiros medievais aos Cantares gallegos de Rosalía de Castro, “toda a historia da literatura galega pode contarse en clave musical”, sostén fundador dos Diplomáticos de Monte Alto Xurxo Souto, que defendeu que, “aínda que parezan mundos moi distantes, poesía e música son en realidade o mesmo”, nun relatorio en Ciencias da Educación e do Deporte con motivo da conmemoración do Día Internacional da Poesía. Unha celebración que forma parte das actividades promovidas pola Comisión PEA-Unesco do centro e que se achegou precisamente á literatura a través da historia dun movemento cultural, o Bravú, do que este músico e escritor foi protagonista e que centra ademais a exposición sobre os 20 anos deste movemento que, grazas á colaboración do Concello, poderase ver neste centro ata o 17 de abril.
“Somos un pobo de artistas e temos que reivindicar esa potencialidade, temos que reivindicar a poesía e a literatura desde a música”, defendeu Souto ao inicio dun relatorio no que realizou un percorrido polos vínculos históricos de ambas expresións culturais. Comezou retrotraendo aos asistentes á época das cantigas de amigo, xa que “Galicia foi a gran potencia da música medieval”, e lembrando que “a banda sonora de moitas películas de corte medievalista son as cantigas de Alfonso X o sabio”, para logo destacar tamén que, tralos Séculos Escuros, “o primeiro libro de referencia” do Rexurdimento non foi outro que os Cantares gallegos de Rosalía de Castro.