O CARBALLIÑO

Celtas Cortos, entre os grupos que actúan na Festa do Pulpo

photo_camera Manuel Dacal e Francisco Fumega, presentando onte o programa da Festa do Pulpo.

Hoxe empezan as actividades entre as que destaca a elaboración da ración xigante de 5,13 metros

O Carballiño recupera a tradición dos grandes concertos para festexar a semana da Festa do Pulpo coa actuación de Celtas Cortos, na Praza Maior, o vindeiro 5 de agosto, as 23:00 horas. A programación, preludio da multitudinaria celebración do segundo domingo de agosto, empeza hoxe con actividades para os máis pequenos, que ocuparán en adiante un importante espazo ata o día da festa gastronómica.

O concelleiro de Turismo, Manuel Dacal e o alcalde de Carballiño, Francisco Fumega, presentaban a programación desta 53 edición, agradecendo a tódolos que colaboran para “levar a bo porto este programa, pensado en tódolos públicos e , sobre todo, para atraer a moitos visitantes a nosa vila durante estes 15 días”.

Entre outras numerosas iniciativas hai que destacar para o 31 de xullo a presenza da banda de música de Valga con máis de 100 musicos, e a proxección na Insua dos Poetas da película A Esmorga. Outra das citas clásicas da semana da Festa do Pulpo é a andaina popular, o 2 de agosto, e nese mesmo día, a actuación de música folk , Festa Rachada e Pasarrúas “Acibeira”. Ás actividades infantís que se desenvolverán cada día hai que engadir competicións deportivas, e para o día 3 o concerto de Skalingrado.

O 4 de agosto, Carballiño volverá a elaborar a ración xigante de pulpo, que este ano se realizará sobre un plato de madeira de 5,13 metros de diámetro, tres centímetros máis co ano pasado. Será ás 20,00 horas na Praza Maior e contarase coa participación de numerosos pulpeiros. O día 6 inauguranse as Xornadas Gastronómicas do Pulpo, con Guillermo González, subcampeon de europa en servicios de restauración e bar, na praza das Galiñas, e as 20,00 iniciase o primeiro ciclo de Música de Sofa na rúa, onde se poderá escoitar e tocar todo tipo de instrumentos e estilos. Xa durante o fin de semana da festa haberá outra xornada gastronómica con Flavio Morganti e o 8 de agosto o concurso de camisetas das peñas participantes.

Xa no día grande o desfile de grupos do festival folclórico empezará ás 10,30 horas, dirixíndose ó Parque municipal, onde terá lugar o xantar e rematando a xornada coa orquesta Fin de Siglo.

Te puede interesar