A programación escollida fomenta valores como o respecto e o compañeirismo
Fundación Ramón González Ferreiro abriu xa o prazo de inscrición para os campamentos de verán. Esta é a terceira edición do formato "Rural Camp" aínda que son moitísimos os anos de experiencia acumulados neste sector.
Durante 7 días os rapaces e rapazas, con idades comprendidas entre os 8 e os 15 anos, entran en contacto coa natureza e o mundo rural a través de xogos, actividades de lecer, música, excursións, mindfulness e obradoiros. Estas xornadas de convivencia, que terán lugar no albergue da Fundación Ramón González Ferreiro, créanse con ilusión, experiencia e co traballo acumulado na educación non formal ao longo de moitos anos. A nosa é unha proposta alternativa, educativa e lúdica que transcorre no entorno rural de Paciños, na vila de Allariz e arredores.
A programación escollida fomenta valores como o respecto e o compañeirismo, a igualdade, a solidariedade, a concienciación ambiental e o coñecemento da vida no rural. O obxectivo é que os/as participantes aprendan a convivir, fagan novas amizades e coñezan distintos lugares, espertando o seu espírito aventureiro e unha maior autonomía persoal ao aumentar as súas experiencias individuais e como membros dun grupo.
Para inscribirse poden contactar en [email protected] ou no 988436182.
