O CEIP Padre Crespo, disfrutando das novas instalacións

28/ene./15 - 23:45 Actualizado: 29/ene./15 - 16:20

A colaboración de toda a comunidade educativa fai posible a mellora educativa do CEIP Padre Crespo

O CEIP Padre Crespo de Xunqueira de Ambía ofrece unha gran variedade de servizos que fan posible que ano tras ano manteñan o número de alumnos no centro.

¿Cales son as prioridades do centro neste momento?

Co esforzo de todos, (profesorado, pais e nais, institucións) estamos renovando o colexio: temos novo pavimento no patio, zona de xogos para os máis pequenos, un novo corredor cuberto, renovamos a cociña, a aula de informática e estamos reformando e ampliando a biblioteca, logo de ser o único colexio da provincia ao que se lle concedeu o Plan de mellora de biblioteca escolares no curso 2013-2014. Temos proxectos pendentes, como a ampliación e renovación do perímetro do colexio, con mellores accesos, zonas verdes e un pequeno horto escolar.

Ademais dos cambios físicos do colexio que outros cambios estades a introducir?

Pedagoxicamente imos cambiando pouco a pouco cuestións de organización tratando de imitar, no posible, modelos dos países nórdicos: horarios, saídas culturais, participación en multitude de programas e actividades nas que se prioriza o traballo colaborativo, interdisciplinar, interciclos, aprender dunha maneira máis lúdica. Dende o curso pasado empezamos coas Seccións Bilingües: plástica en toda a Primaria e Coñecemento para os maiores. Tamén estamos nos Contratos Programa, para a mellora das competencias básicas (lectura, cálculo, escritura). Este curso, coma novidade, empezaremos a principios de febreiro no PROA, programa de reforzo educativo fóra do horario escolar, con transporte gratis para os cativos.

Falando de cambios temos que mencionar a innovación educativa, en que proxectos participa o centro?

Actualmente participamos en 3 plans Proxecta de innovación eductiva: Consumópolis (consumo responsable), sustentabilidade e paisaxe (intervención no contorno do colexio) e o Aliméntate ben, tentamos promover dende o colexio o deporte, os hábitos e unha alimentación saudable. Ofrecémoslle ao alumnado, dentro do noso programa, un almorzo saudable ás 11:20 h, evitando así todo tipo de bollería industrial e chucherías. Temos traballado moito na mellora dos menús, supervisados por un nutricionista, introducindo produtos ecolóxicos e unha variedade de alimentos non propia dun comedor escolar tipo.

Aos usuarios do comedor escolar gústanlle os cambios?

Os nenos están respondendo xenial, e desfrutan moito da gran variedade de pratos e das actividades entorno os menus saudables. Inculcamos a cultura gastronómica con pratos típicos de outras comundiades autónomas.

Existe coordinación entre os centros máis próximos para poder realizar actividades conxuntamente?

Colaboramos abertamente cos centros escolares da comarca, aunando esforzos e optimizando os recursos, tanto humanos coma económicos, dos que dispomos. Grazas a esta colaboración puidemos organizar o Certame Literario “Falando de Solidariedade” dende o noso centro ou puidemos contar coa presenza de varios autores e contacontos.

Que actividades se levan a cabo no CEIP Padre Crespo despois da xornada escolar?

Despois da xornada escolar no centro impartense clases de reforzo, baile, pandeireta, actividades deportivas, inglés e informática organizadas polo Concello de Xunqueira de Ambía e a Anpa do centro.

Josefina Estévez

Especialista en Educación Infantil

Titora dos alumnos de 3 e 4 anos de educación infantil. Igual que os demáis compañeiros do CEIP Padre Crespo de Xunqueira de Ambía participa no servizo do comedor escolar.