CEIP Carlos Casares de Xinzo de Limia e o CEIP Filomena Dato de A Valenzá conmemoraron o Día da Bici
O Día da Bici conmemórase en centros de ensino de toda a provincia. Exemplo disto son as actividades organizadas polo CEIP Carlos Casares de Xinzo de Limia e o CEIP Filomena Dato de A Valenzá co fin de promocionar o uso deste medio de transporte, que ademais de ser saudable, é sostible.
Así, en Xinzo, os nenos e nenas máis cativos, que habitualmente acoden ao centro andando, nesta ocasión o fixeron en bicicleta. Aos escolares encantoulles esta experiencia coa que se promoveu un estilo de vida saudable, seguro e divertido.
Pola súa banda, no CEIP Filomena Dato, centro inmerso no Plan Proxecta de Mobilidade Sostible e Segura, apostaron polas bicicletas para facer un percorrido polas rúas de A Valenzá, acompañados por escolares do CEIP O Ruxidoiro. Nesta ocasión os escolares que participaron na actividade foron os nenos e nenas de 6º de Primaria, que contaron coa colaboración da Policía Local, Protección Civil a DXT e o Concello de Barbadás para que a actividade fora un éxito.
En ambos casos tratouse dunha xornada moi divertida, diferente ás habituais e perfecta para promocionar un medio de transporte respectuoso co medio ambiente.