Escolares do IES Otero Pedrayo foron os representantes ourensáns do proxecto lingüístico que resultou ser todo un éxito
O instituto Otero Pedrayo foi o centro ourensán escollido para participar no proxecto "21 días en galego e+". A experiencia foi moi satisfactoria e os alumnos e alumnas tomaron moi en serio esta actividade, que a pesar de ser educativa contou con propostas lúdicas. Así, as actividades estiveron estreitamente ligadas ao mundo audiovisual e os participantes na iniciativa elaboraron guións, montaron vídeos e compartiron no blog do proxecto todas as iniciativas que realizaron en galego. Contaron coa colaboración do alumnado de 2º de Bacharelato para a elaboración do material audiovisual.
O domingo, día 3 de febreiro, cumpríronse os 21 días en galego e algúns dos escolares xa lles indicou ás súas mestras que están animados a seguir falando en galego, xa que moitos deles xa o fan habitualmente nas súas casas.
A seguinte e última cita do proxecto será no mes de maio. Un grupo de 50 escolares de ESO do Otero Pedrayo viaxará á Cidade da Cultura en Santiago de Compostela para compartir unha xornada de convivencia cos escolares dos outros tres centros que se sumaron a este proxecto lingüístico. Durante a xornada contarán con numerosas actividades e concertos. Será o colofón perfecto a unha actividade que está a entrar nas aulas galegas co fin de promover o uso da lingua galega.