No CEIP Castrelo Do Val contan con seccións bilingües e un auxiliar de conversa nativo de Chicago (EEUU)
O CEIP Castrelo do Val sitúase na vila de Castrelo de Val, preto de Verín, dentro da comarca de Monterrei. Este centro educativo inaugurouse no curso académico 1983-1984. No ano 2005 a matricula notou un alarmante descenso pero actualmente o centro está tendo un crecemento considerable e conta con 75 alumnos matriculados.
Dende que abriu as súas portas, o CEIP Castrelo do Val ten cociña propia. Carmen cociña para os alumnos do centro dende hai máis de 30 anos.
Tamén houbo cambios no que se refire á catalogación do centro. No 2005, o centro estaba catalogado con tres unidades: unha de Educación Infantil e dúas de Educación Primaria. Actualmente e debido ao aumento de matrícula destes anos anteriores, o catálogo do centro duplicouse, esto é seis unidades: dúas de Educación Infantil e catro de Educación Primaria. Este aumento, supuxo tamén o incremento da plantilla docente pasando de 4 mestres a 12 mestres que hai hoxe.
Cales son as directrices nas que traballa a dirección do centro?
Traballamos para intentar manter a matrícula, algo que non é sinxelo ao tratarse dun centro do rural. Intentamos integrar as novas tecnoloxías no día a día, por iso trataremos de contar cunha Pizarra Dixital Interactiva en cada aula para apoiar a labor docente. Ademais a aula de informática e as tablets coas que contamos no centro intentan que o proceso de aprendizaxe sexa o máis efectivo posible. Iso sí, sen esquecernos da lectura de libros en papel e de xogos tradicionais. Debemos aproveitar o mellor de cada recurso.
Cales son as novidades de este curso escolar?
Este curso continuamos coas sección bilingües comezadas o ano pasado e, como novidade, contamos dous días á semana cun auxiliar de conversa, nativo de Chicago (EEUU).
¿Con que instalación conta o CEIP de Castrelo?
Contamos con dúas aulas de Infantil, catro de Primaria, Aula de Inglés, Aula de Música, Aula de AL e PT e, por suposto, a Biblioteca na que está tamén integrada a parte informática.
O CEIP Castrelo do Val é un colexio moi dinámico, en que concursos participan os alumnos?
Como todos os anos participaremos nas actividades de deporte escolar (campo a través) e no desfile de Entroido, ademais dos concursos que imos considerando interesantes ao longo do curso.
Forman parte do Plambe que cambios supón para o alumnado, e para o profesorado, estar no plan de melloras de bibliotecas escolares?
Non houbo grandes cambios no que respecta ao profesorado e ao modo no que traballabamos antes na biblioteca xa que se facía moi ben. Quizáis a diferenza é que agora temos unha biblioteca con mellores condicións e uns títulos máis actualizados, grazas ao Plambe. Foi un bo impulso para a mesma.
Que actividades se levarán a cabo proximamente na biblioteca do centro?
Organizamos contacontos, tanto os que nos veñen a contar como os que os propios nenos preparan para contarlles aos seus compañeiros e compañeiras. Tamén comezamos hai uns anos coa hora de ler, que consiste en que ao chegar á escola, de 9:30 a 9:50 todos os nenos e nenas do colexio, ou están lendo ou lles están contando un conto, no caso dos máis pequenos.
Que actividades extrescolares se levan a cabo?
Como actividades complementarias realizamos varias saídas na comarca e a Ourense no caso das actividades de teatro e actuacións musicais. Por outra banda están as actividades extraescolares que oferta a AMPA do centro, que son informática, baile, pintura, inglés, e unha nova que consiste en desenvolver a intelixencia a partir do ábaco, xogos, étcétera.
DIRECTOR, VÍCTOR PÉREZ
O director do Ceip Castrelo do Val leva seis anos no centro, este é o primeiro ano que compaxina a labor docente coa de director do centro escolar É o titor de 6º de Educación Primaria, imparte Matemáticas, Lengua, Lingua, Valores e Naturais.
MESTRA EDUCACIÓN INFANTIL, ELISABETH DE DIOS GONZÁLEZ
Betty, como a coñecen no colexio, é a titora dos alumnos de tres e catro anos e a responsable do comedor escolar do centro educativo de Castrelo do Val.
MESTRA DE EDUCACIÓN PRIMARIA, SILVIA RODRÍGUEZ PEÑA
Silvia é a titora do alumnos de 1º e 2º de Educación Primaria tarefa que comparte coa responsabilidade da biblioteca do centro educativo.
MESTRA PEDAGOXÍA TERAPÉUTICA, Mª ÁNGELES VICENTE GAGO
Encárgase das actividades extraescolares que se realizan no Ceip Castrelo do Val. É a mestra que se axuda aos alumnos con necesidades específicas de apoio educativo.
MESTRA DE INGLÉS, BEATRIZ RIVERO GUERRA
Forma parte do equipo directivo levando a cabo as tarefas de secretaría. Tamén é a responsable das seccións bilingües en primaria impartindo plástica.
MESTRA EDUCACIÓN PRIMARIA, MARÍA MONTSERRAT MARTÍN NIETO
Montse leva tres anos no centro educativo de Castrelo do Val. É a titora dos alumnos de 5º de primaria.
