No CEIP do Bolo participan en interesantes actividades coas que aprenden a expresarse ou suman selos do pasaporte solidario
Se ben moitas veces é máis complicado que os escolares do rural sumen novos proxectos e participen en actividades novidosas, o CEIP O Bolo é o claro exemplo de todo o contrario. O grupo de docentes traballa arreo para brindarlle aos seus alumnos a mellor e máis completa das formacións. Así, este curso están inmersos en numerosos e moi variados proxectos, dos que mencionaremos soamente algúns por ser novidosos e menos habituais. Voluntariado miúdo: Móvete! é un programa da Consellería de Política Social que busca a promoción da adquisición de competencias a través de proxectos de acción voluntaria que permitan fortalecer a educación en valores solidarios dende realidades concretas adaptadas ás idades do alumnado.
Así, o alumnado do CEIP O Bolo acode cada martes ao centro de maiores que a Fundación San Rosendo ten no municipio para compartir actividades cos internos. Son propostas interxeneracionais onde todos aprenden e ao tempo se divirten. Entre as accións deste programa educativo está por exemplo indicar o camiño a un peregrino que atopen no camiño, indicar un lugar do municipio a alguén que acode por primeira vez a O Bolo, etcétera. Todas estas accións suman selos do propio centro que se plasman nos pasaportes solidarios que teñen cada alumno e cos que obteñen posteriormente diplomas acreditativos.
Outro dos proxectos destacados do centro ten que ver cos medios audiovisuais e a súa finalidade é traballar na expresión oral do alumnado. Os profesores atoparon certas carencias neste aspecto, se ben a comprensión é perfecta, e puxéronse xa a traballar no tema. Recorren así a temas de historia, como a Idade Media, ou outros aspectos de interese para traballar este aspecto tan importante da formación do alumnado.
