CULTURA

600 xoias de Celso Emilio

local1S2-archive-2011-10-11-mq9i1704
photo_camera Celso Emilio Ferreiro, nunha fotografía dunha exposición na Casa dos Poetas de Celanova.

A Fundación Celso Emilio Ferreiro recupera nunha edición exclusiva e artesán o poema "Miña Matria Galicia", cincuenta anos despois de que o celanovés gañase o premio "Rosalía" nos Xogos Florais do Idioma Galego de Bos Aires de 1968. 

Hai cincuenta anos que Celso Emilio viaxou ao país dos ananos. A sátira que publicou contra os emigrantes ricos e envilecidos, os mesmos que o botaran da Hermandad Gallega de Venezuela naquel tempo, é un espello do cru 1968 que pasou o poeta celanovés. De oficio en oficio, de persecución en persecución. Dos oasis que atopou naquel deserto, a fundación que leva o seu nome, recupera agora un: "Miña Matria Galicia". Unha edición exclusiva que so chegará a 600 mans. Un poema que foi galardoado co premio "Rosalía" na modalidade de "Canto a Muller Galega", nos Xogos Florais do Idioma Galego de Bos Aires de 1968. 

Luis Ferreiro, fillo do poeta e presidente da fundación que o homenaxea, anda cun maletín pola Galicia a que lle escribiu seu pai, agasallando aos amigos da literatura de Celso Emilio con algún destes coidados exemplares, feitos a man, un a un, no obradoiro de "El gato gris ediciones", co deseño de José celsoemiliolibrosNoriega e que xamais se porán a venta. 

"Quixemos facer unha lembranza daquel fito tan importante hai cincuenta anos, porque, a partir daqueles Xogos Florais, naceron moitos máis premios que tiñan que ver coa lingua e literatura galega. Esta edición é especial e única, non se repetirá. É unha forma de espallar ou confirmar o nome de Celso Emilio Ferreiro", conta Luis Ferreiro deste canto de amor á terra que fixo seu pai en 1968 e que comeza así: 

"Galicia é unha Matria, /unha matriz de terra e tempo/ debruzada na noite profundísima, / parindo fillos de saudade e soño".

Na portada, luce a firma e un autoretrato de 1938 de Celso Emilio Ferreiro. "Este é un dos grandes poemas de Celso Emilio sobre as 'Nais' fundadoras do solar galaico, aquelas viudas de vivos, cantadas no poema. Damos eiquí a versión orixinal publicada pola Editorial 'NOS' de Bos Aires no ano de 1969", explícase no interior do poema. Outra curiosidade é que o mantedor daqueles  xogos fora Méndez Ferrín. No xurado estaban Juana de Ibarborou, Víctor Lois Molinari e Francisco Lois Bernárdez.

"É un canto de amor a Galicia que coincide nunha época na que a terra se reivindicaba clandestinamente en moitas ocasións. Era a terra da emigración, da xente que non podía vir, dos problemas para defender a identidade e o idioma", relata Ferreiro. 

¿Qué verba lle darei a tanta escuma?/ ¿Con qué voz chamarei, nun soio nome,/ ao amor, á forteza, ao agarimo, /a morna luz da casa vinculeira?; pregúntase Celso Emilio cara o final do poema. 

"Miña Matria Galicia" é un principio. O primeiro poema da colección "Longolerei, chesmanei", que, sen présa, fan os herdeiros. Á luz sairán escritos inéditos do poeta grazas á labor de quen o coñeceu mellor. A súa familia. Luis Ferreiro, o primoxénito, defíneo: "Era meu pai". 

Te puede interesar