Os traballos para a sinalización do xacemento rematarán en outubro
O xacemento castrexo de Santa Lucía, en Castrelo do Miño, transformarase nun "museo ó aire libre" ó traverso da execución dun proxecto integral de mellora dos accesos e de instalación de paneis identificativos dos achádegos dos arqueólogos nas diferentes zonas do recinto. O Concello solicitou do departamento autonómico de Turismo unha subvención de 35.000 euros, que lle foi concedida, e que será destinada nun 50% para levar a cabo estes traballos, reservando a outra metade para a creación dunha rede tecnolóxica de visualización do patrimonio do municipio.
O alcalde de Castrelo, Xurxo Rodríguez, apunta que "o obxectivo é delimitar o xacemento e facilitar a accesibilidade ós visitantes cun roteiro con paneis explicativos en cada punto de interese. Neste sentido, habilitarase unha sinalización no lagar rupestre atopado no castro, datado entre os séculos I ó II d.C. e que está considerado como o máis antigo de Galicia. Ademais, tamén se contemplan visitas ás construcións castrexas de formación circular e a unha serie de muros de edificacións da época galaicorromana, que serán debidamente identificados. As previsións do goberno local de Castrelo apuntan a que "estas obras estén xa rematadas a finais do vindeiro mes de outubro", tal e como indicou Xurxo Rodríguez.
As excavacións realizadas no castro, ubicado na parroquia de Astariz (Castrelo de Miño), correron a cargo, nos últimos dous anos, do Grupo de Arqueoloxía do Campus de Ourense da Universidade de Vigo, baixo a dirección do profesor Fermín Pérez, ó traverso dun convenio entre a Universidade de Vigo e o propio Concello.
