¿Dónde estoy?  > Ourense

O magosto municipal volveu ser multitudinario, xa que foron centos as persoas que se achegaron á Alameda da cidade para participar na festa por excelencia, na que puideron degustar 1.000 kilos de castañas e con productos para celíacos.

Unha familia oriental degusta as castañas no magosto da Alameda. (Foto: Xesús Fariñas)

As castañas chegaron á Alameda da cidade a mediodía. Xa dende ese momento, moitos ourensáns ‘supervisaron’ a preparación do que é xa o magosto por excelencia en Ourense. O que máis xente reúne e o que acada proporcións maiores. Nembargantes, non foi ata as cinco da tarde cando a festa comezou a ser tal e entraron en acción os 1.000 kilos de castañas, 4.000 chourizos e 400 litros de viño que a organización tiña preparada. Ademais, e por segundo ano, os celíacos tiñan a oportunidade de degustar o tradicional ‘bolo preñado’ con pan e chourizo sen gluten, nun ha oferta na que o Concello vai da man da asociación de celíacos de Ourense.

A concelleira de Cultura, Isabel Pérez, salientaba a grande afluencia de xente, xa que aseguraba que ‘máis de 4.000 persoas consumen os productos, ás que hai que engadir tamén as que veñen e non consumen e as que participan na Praza Maior da Mostra do Patrimonio Cultural. Cremos que haberá máis de 10.000 persoas desfrutando destas actividades’, comentou, ó tempo que lembrou que o magosto é festa de interese turístico desde o ano pasado. Coa concurrencia no municipal e a cantidade deles que onte se celebraron na cidade, sen dúbida o magosto goza de boa saúde.