¿Dónde estoy?  > O Carballiño

Ante a polémica xerada a respecto da posíbel decisión dos pais e nais do colexio ‘Calvo Sotelo’ sobre a implantación da xornada única, a asamblea do BNG do Carballiño manifestou que ‘corresponde ós órganos internos do propio centro educativo tomar a decisión que consideren máis apropiada para a maioría do alumnado’.

Os responsables da formación nacionalista engaden que, ‘en ningún caso, os partidos políticos deberán influír nin alterar a decisión democrática de ningún dos axentes que forman parte, tanto da dirección do centro coma dos seus traballadores e, por suposto, dos seus usuarios’.

Neste sentido, o secretario local do BNG, Eladino Cabanelas, sinala que ‘os partidos debemos manifestarnos tan só para defender que se poida tomar unha decisión tal e como está estipulado na lexislación, e sen coartar un posible resultado antepoñendo intereses espurios ós propios da comunidade educativa’. No BNG carballiñés consideran que ‘a argumentación esgrimida polo delegado territorial da Xunta, Rogelio Martínez, é moi pobre, en tanto que un gasto de 60.000 euros anuais engadido ás enormes cantidades que supón este orzamento a nivel provincial resulta comparativamente irrisorio e facilmente asumible polo Goberno autonómico’.

Asamblea

Os nacionalistas apuntan que ‘temos claro que esta motivación obedece, non tanto a reducción de gastos como ás políticas de continuo desmantelamento do ensino público, tal e como se pode constatar na redución de máis de un 7%, no capítulo de investimento da Xunta para o transporte escolar’. Por outra banda, a comisión de pais que defende a xornada continuada no colexio convocou unha asamblea xeral para mañá mércores. A xuntanza será ás 20.30 horas na Casa da Cultura do Carballiño, e nela acordaranse novas medidas de protesta’.