¿Dónde estoy?  > Ourense

O Concello de Ourense destacou onte que o Tribunal Supremo (TS) ditou sentenza favorable ao desestimar o recurso presentado pola empresa Subproductos Galegos S.A. (Sugasa), que pedía unha indemnización de 1,7 millóns de euros por decretar en 2001 o cese da súa actividade durante o 'caso das vacas tolas'.

Segundo recordou o Concello, ordenara o peche das instalacións porque 'estaba a exercer unha actividade para a que carecía de licenza', ao incinerar reses durante as vacas tolas, 'ocasionando un grave problema de saúde pública e contaminación a un regato próximo ás súas instalacións.

A empresa reclamou unha indemnización alegando supostos danos e prexuízos ocasionados por esta decisión municipal. A reclamación foi desestimada por acordo da comisión de goberno do Concello do 27 de novembro de 2003.

Sugasa recorreu nos xulgados a decisión da Casa e en novembro de 2008, a Sala do Contencioso Administrativo do Tribunal Superior de Xustiza de Galicia (TSXG) ditou sentenza na que desestimou as pretensións da demandante, o mesmo que agora o Supremo.