¿Dónde estoy?  > O Ribeiro

O grupo municipal do PP de Carballeda de Avia apuntou unha serie de irregularidades que aprecia no novo servizo de recadación municipal, do que se fixo cargo o Concello iste ano tras ser traspasado pola Deputación. O voceiro 'popular', Lorenzo González, indica que o periodo de pagamento do imposto de vehículos e das taxas de lixo e sumidoiros, do 23 de xaneiro ó 23 de marzo, 'é bastante adiantado ó que se viña aplicando, que era de abril a xuño'.

Ademais, o PP detectou que nos recibos dos vehículos 'non figura o ano ó que corresponde o imposto, nin o DNI do obrigado tributario', mentres nos do lixo non aparece 'a dirección nin referencia catastral da vivenda obxecto do devandito imposto'. Lorenzo González suliña que, neste caso, 'os veciños con dous ou máis inmobles non poden ver reflexado nos recibos cáles corresponden ás súas propiedades'.

Pola súa banda, o alcalde, Luis Milia, manifesta o seu asombro pola postura dos 'populares'. O rexedor asegura que 'tódolos recibos son legais e non hai irregularidades, pero ós do PP non se molestan en preguntalo nas oficiñas do Concello'. Neste sentido, Milia afirma que 'é normal, porque o voceiro do PP só vive da política, xa que traballa na Deputación provincial'.