Opinión

Ponte Nova, Ponte Nova

Dígoche, ponte centenaria xa desde este ano, que te poñas nova. Que te poñan nova, mellor dito. Unha boa volta xa lle deron -limpa fixa e con esplendor- aínda que haxa burros que ornean co spray nos seus baixos; a min aínda me gustaría que lle desen outra reviravoltiña.

Si, houbo no seu momento algún proxecto que non me atrevo a cualificar de propio de “mala besta”, porque os tempos cambian e as sensibilidades tamén, e o que hoxe é normal, dentro duns anos é unha barbaridade e ao revés, por iso debemos ser xenerosos xulgando o pasado. En fin, queríalles dicir que hai anos houbo quen pensou en anchear a “caixa” da ponte facéndoa voar aos lados para meterlle máis carrís. Pero por sorte ou a Deus grazas, segundo se prefira, non foi adiante e o tema e salvouse a estrutura, a liña, o xenio e a figura.

Pero hai unha cousiña que se podería facer que inda a melloraría. Voulla explicar e despois xa me dirán se é disparate ou non; que creo que non. Digamos que a ponte é ponte porque comunica en dous sentidos, digamos que para ir ou vir de Canedo, do barrio da Ponte. E temos clarísimo que no sentido de Canedo a Ourense hai un só carril para os coches e veñen uns detrás doutros, sen máis historias, ata que ao chegaren á altura do semáforo da Romántica se organizan en dous ou tres carrís: os que van cara ás Lagoas, os que soben por Celso Emilio ou Manuel Pereira e os que seguen recto vaian á Sáenz Díez ou, antes, a Eduardo Barreiros. Ben. Tamén sabemos que cando se “sae” de Ourense cara a Canedo, non está tan claro se hai un carril ou dous. Un, di radicalmente a policía e o sentido común; ben ancho, pero un. E ao chegar á rotonda do final divídese entre os que torcen para Oira e os que seguen recto, vaian para a Estación ou vaian cara ao 12 de outubro. 

E ese carril ancho de menos para dous pero de máis para un, lémbrame ás camas de ferro antigas chamadas de “praza e media” que nunca entendín, pois durmir unha persoa e media parece complicado. Así pois, ese “carril e medio” tamén ten inconvenientes, e xa case ninguén se pon en paralelo para ir case petando co coche ata chegar á rotonda de entrada en Canedo.

E eu creo que sería ben interesante, fermoso, humanizador, etc. eliminar ese “medio carril amplo” de saída que non arranxa nada e repartilo entre as dúas beirarrúas para facérmolas ambas máis anchas, dándolle, se cadra, un chisquiño máis á de augas arriba que xa é de seu un pouco máis estreita. 
 Os que a cruzamos con asiduidade sabemos que os pasos para a xente son bastante estreitos. Xa non digo cando se cruza un cun carriño de neno ou cando chove, cos paraugas que tropezan uns cos outros e cos coches, se non están ben os desaugues, mollando polos baixos. Creo que sen moito problema o que se lle lambese a ese semicarril podería dar para anchear cada beirarrúa un metro e así quedaría moito mellor e organizado e cos condutores de saída máis tranquiliños respectando a fila, si ou si, sen tratar de “colarse” temerariamente. Igual ancho de entrada que de saída, e máis anchos os pasos a pé. Paréceme que sería un bo regalo de centenario, sobre todo porque nolo fariamos a nós mesmos. 

Te puede interesar