Tras “800 balas”, o director Álex de la Iglesia volve ós seus principios con “Crime ferpecto”, unha comedia negra de acción, de ritmo trepidante, sobre a ascensión e caída libre (rápidas as dúas) de Rafael, ou Guillermo Toledo, un desaprensivo, egoísta, calculador e ambicioso vendedor duns grandes almacéns, depredador de mulleres, quen, por culpa dun estúpido asasinato accidental, auténtico crime chafalleiro, acaba caendo nas mans de Lourdes, ou Mónica Cervera, a máis fea dependenta do establecemento, con impulsos de ninfómana, que lle ten ganas e que lle axusta as contas por tantos anos de desprezo. A vítima é agora o seu verdugo, a súa obsesión e o seu tormento.
A película, que está máis na liña de “Mortos de risa” que de “A comunidade” (aínda que semella que bebe das dúas) ten un magnífico inicio e unha longa formulación inicial (os primeiros 40 minutos son trepidantes), que atrapa, e momentos brillantes de comedia (como o uso que fai o vendedor do mobiliario do gran almacén para os seus ligues ou os métodos tramposos de venda que usa) e algúns pasaxes do humor salvaxe do autor (onde de verdade recoñecemos ó mellor Álex de la Iglesia), como a surrealista cena de Rafael na casa de Lourdes para coñecer á familia (impresionante a irmá desta!) da que pretende ser a súa futura muller.
É no desenvolvemento da trama e a resolución do crime “ferpecto”, algo embarullado e labiríntico, onde a película é máis feble, máis fráxil e irregular, o que lle impide redondear, completar a comedia, que, non obstante, corrixe de novo o rumbo cara ó final cun gracioso desenlace inesperado en plan de ensinanza. Filme, polo tanto, abstracto e hiperrealista, cunha posta en escena espectacular (claro que todas as postas en escena de Álex de la Iglesia son marabillosas). Non obstante, e aínda que ofrece momentos que chaman bastante a atención, “Crimen ferpecto” acusa a tentación do exceso no que cae bastante a miúdo o director, pero vese compensado todo iso polas escenas de acción e polo descubrimento de Luis Varela, un máis que divertido fantasma.
