Os alumnos do Bolo convértense en reporteiros por un día en Telemiño

O plato de Telemiño converteuse nunha aula moi especial para o colexio do Bolo. Os seus alumnos trasladáronse ata as instalacións da canle de televisión local de Ourense para coñecer como se fan os programas e converterse en estrelas da pantalla por un día.

Dende a localidade da comarca de Valdeorras, os alumnos chegaron moi emocionados e prestaron moita atención para comprender como se fai a tele. Por grupos ocuparon os asentos do programa En Portada para facer unha tertulia explicando cales son as cousas que máis lles gustan de vivir no Bolo e cales serían para eles as melloras que farían do seu colexio e do seu concellos uns sitios máis especiais.

Non sen antes pasar por maquillaxe e visitar o control de realización para prestar moita atención ás explicacións dos técnicos e presentadores de Telemiño de todo canto fai que se poida emitir na pequena pantalla.

Finalmente, xunto con Susana Bayo, os alumnos do colexio do Bolo animáronse a dar o tempo e aprenderon a ler un mapa meteorolóxico. De onde vén o vento, que significan os símbolos ou os números das temperaturas foron algúns dos detalles que ofreceron nesta xornada como presentadores de Telemiño.

Foi unha excursión moi divertida que converteu o plató da canle local nunha aula moi especial para estes pequenos reporteiros do Bolo.