Xornal Escolar
Conciliación e moita diversión en Amencer
Fotos: Martiño Pinal
Un ano máis -e xa van preto de tres décadas- o curso escolar comeza na asociación xuvenil Amencer co seu “Tempo de troula”, unha iniciativa pensada para ofrecer unha alternativa de conciliación ás familias mentres non empezan as xornadas completas nos centros educativos. Deste xeito, os máis pequenos da cidade teñen a posibilidade de gozar dun espazo de diversión e aprendizaxe mentres van recuperando pouco a pouco as rutinas do novo curso.
Separados por grupos de idade para cumprir coas medidas e protocolos covid, os participantes son un grupo de mozas e mozos fieis á proposta lúdica, que se desenvolve nos meses de setembro e xuño. Obradoiros, xogos cooperativos, experimentos de ciencia divertida ou clases de cociña son algunhas das propostas preparadas para o Tempo de troula deste ano.
Así, mentres os maiores fabricaban o seu propio volcán a base de vinagre e bicarbonato, os máis cativos preparábanse para percorrer o edificio en busca das pistas que os levasen a atopar o doce tesouro que os monitores tiñan preparado para eles. O importante nestes casos é divertirse e aprender xogando. Aprender a traballar en equipo ou o divertida que pode ser a ciencia, mentres as familias ourensás contan cun espazo seguro ó que confiarlle ós seus pequenos mentres se pon en marcha toda a engranaxe das actividades lectivas.
Un xeito diferente de voltar á rutina e de aproveitar ó máximo as últimas tardes do verán.