Xornal Escolar
Misión: curar a amnesia viaxeira en Seixalbo
Este verán, Leo estivo de vacacións por un montón de países. Ó chegar de volta ó seu colexio, en setembro, tivo un percance na biblioteca. Caeulle un libro moi gordo na cabeza e esqueceu todo o turismo que fixo este verán. Por iso, este curso o colexio de Seixalbo ten unha misión clara: axudarlle a Leo -a mascota da biblioteca- a lembralo todo.
E para facelo, a cada aula foille asignado un país sobre o que xa están aprendendo unha morea de cousas que lle irán explicando a Leo durante todos estes meses, a ver se entre todos conseguen refrescarlle a súa memoria viaxeira.
Reino Unido, Países Baixos, Exipto, Italia, Francia ou Brasil son algúns dos países que lle dan forma ó proxecto global deste curso académico e sobre o que xirarán tódalas actividades que se desenvolvan ó longo deste meses. Un exemplo foi o Samaín, onde xa traballaron a temática do terror dun xeito xeográfico.
O mesmo acontecerá co Entroido ou o Nadal, pero mentres, cada día van aprendendo cousas novas sobre os destinos asignados. Que comen en Italia? Como son as casas en Países Baixos? Que representa a bandeira de Brasil? A estas e máis preguntas xa comezaron a buscarlle respostas para todos xuntos conseguir sanar a amnesia de Leo. Os alumnos están moi entregados á causa e divírtense aprendendo sobre outras culturas mentres resolven a súa misión deste curso.