Mañá venres dará comezo o seminario promovido pola Universidade de Santiago de Compostela en colaboración co Concello de Xinzo de Limia que levará por título “Competencia intercultural, empregabilidade e participación. Vías para a inclusión sociolaboral de persoas migrantes”.
Tal e como destacaron dende o Concello de Xinzo, do mesmo xeito que nas xornadas “Camiños de coñecemento e experiencia” dirixidas a maiores de 50 anos, esta última proposta, que se desenvolverá dende mañá e ata o vindeiro día 31 de maio, contou con moi boa acollida por parte dos veciños, feito que motivou o seu cambio de ubicación do Salón de Plenos á Casa da Cultura de Xinzo. Neste senso xa hai máis de 20 inscritos e as persoas interesadas aínda teñen tempo de anotarse na área de Educación, Inmigración e Minorías do Concello ou chamando ao teléfono 988 550 528.
O curso terá unha duración total de 20 horas e os participantes terán que asistir, como mínimo, ao 80 por cento das mesmas para conseguir o certificado pertinente.
A formación comezará ás 16,00 horas e contará coa presenza dos expertos Alexandre Sotelino Losada, Ana Vázquez Rodríguez e Xosé Losada Enríquez e continuará o sábado con nocións sobre a competencia intercultural e para a construción dunha traxectoria profesional no marco migratorio. O curso rematará o vindeiro luns cunha sesión telemática.
