A campaña “Merca no teu concello" rematará este mes

Os premios dividiranse en bonos para mercar no territorio ou para unha estancia nun hotel ou casa rural

A campaña de apoio ao pequeno comercio "Merca no teu concello, sen ir máis lonxe" rematará o vindeiro día 30 deste mes de setembro. Trátase dun plan co que o Grupo de Desenvolvemento Rural Limia Arnoia quere axudar na dinamización e na aposta polas tendas de proximidade dos 25 concellos das comarcas de Allariz e Maceda, Terras de Celanova, A Limia e a Baixa Limia. 

Tal e como recordan dende o GDR, ata o 30 de setembro de 2020 estará aberto o prazo para participar no sorteo de 58 premios por valor de 180 euros cos que se poderá consumir en establecementos afectados polo estado de alarma -venda ao por menor, hostalería e servizos- dos municipios integrados no Grupo de Desenvolvemento Rural. 

Poderán concorrer ao sorteo todas as persoas que realicen compras superiores a 40 euros en calquera establecemento de venda ao por menor e hostalería dos 25 concellos. Neste senso, haberá dous tipos de premios: un de 180 euros para consumir en todo o territorio do Grupo de Desenvolvemento Rural, e outro integrado por 50 euros para a estancia nun hotel ou casa de turismo rural e 130 euros para consumir neste entorno. Todos estes premios poderán gastarse ata o 10 de decembro de 2020.

Te puede interesar