Ao primeiro encontro asistiron agricultores, gandeiros, ecoloxistas e responsables da Xunta
A Mesa da Limia, creada para loitar contra a problemática dos residuos que orixina a actividade agrogandeira, é unha realidade dende onte. O Conselleiro de Medio Rural, José González, presidiu unha primeira xuntanza no Salón de Plenos de Xinzo á que asistiron representantes do sector agrogandeiro, pataqueiros, ecoloxistas, regantes, asociacións e outros representantes institucionais, como o director xeral de Gandaría, Agricultura, e Industrias Agroalimentarias, José Balseiros; e a delegada territorial da Xunta en Ourense, Marisol Díaz Mouteira.
José González escoitou as demandas e preocupacións dos distintos axentes económicos e sociais da comarca, e subliñou que o principal obxectivo da Xunta "é apoiar o mantemento dunha actividade agrogandeira rendible na comarca e, por ende, en toda Galicia". Ademais, o representante autonómico asegurou que se está traballando na recuperación e posta en valor das terras agrarias. Por este motivo, se está a elaborar unha lei específica, e se está traballando na potenciación da calidade das produccións do agro.
O encontro de onte deu continuidade ás outras reunións mantidas con anterioridade polos máximos representantes de Medio Rural. O propio conselleiro reuniuse o pasado mes de xaneiro con diferentes colectivos da Limia. Tamén o propio director xeral de Gandaría, Agricultura e Industrias Agroalimentarias, José Balseiros, fixo o mesmo a finais do pasado mes de febreiro.
