"Oceanoe. Travessía polo Mar das Antelas" será unha viaxe imaxinaria en barco pola Lagoa de Antela que percorrerá lugares senlleiros da comarca.
O proxecto mestura literatura, música e audiovisual.
Si. O conto que escribirán Irene Veiga e Xico Paradelo será unha viaxe da Arca pola Lagoa de Antela e, nas diferentes paradas, gravarase un videoclip. Serán, en total, 15 temas.
Máis de 50 músicos colaborarán co proxecto: unha gran familia.
Si, de feito, en cada parada que fará a Arca estarán músicos que xa actuaron na sala de concertos e que para nós son moi especiais. Hai moitos máis, claro está, pero non entran todos.
Promocionarán, ademais, a comarca da Limia e os seus lugares máis emblemáticos.
Si porque a Arca "achegarase" a municipios e sitios estratéxicos e bonitos da Limia.
Xa comezaron coas gravacións?
Así é, de feito, xa fixemos un videoclip na Torre de Pena e outro no río de Piñeira de Arcos. Neste último tamén se miraba a Torre do Castro. Estaremos en Porqueira e na súa fervenza. A seguinte gravación será o vindeiro 1 de maio.
Que músicos ou grupos participarán?
Xa estiveron gravando Magdalena Gamallo e Héctor Lorenzo. Contaremos con Belém Tajes, O Leo, Uxía, Luis Pastor, Lourdes Guerra, Brais Morán, a Banda da Loba ... É xente que se coñece, ou non. Imos mesturando.
Quen leva a cabo todo o proceso de sonido e o audiovisual?
Da gravación do audio estase encargando Serxio Tannus, que foi guitarrista de Uxía. É un "crack" da guitarra e agora montou un estudo de gravación. Por outra banda, os vídeos os está facendo Lucía Cortiñas. Ela é percusionista e estudou Audiovisuais.
Iniciaron unha campaña de mecenado para poder financiar o proxecto.
Si, de feito, nun día acadamos xa o 20 por cento. Non todos os proxectos o conseguen. O obxectivo son 15.000 euros e, nun día, chegamos aos 3.000 euros. Está moi ben a verdade. Os fondos destinaranse á edición do libro, ás gravacións e ao pago dos músicos que participarán.
Que foi o que a motivou a embarcarse neste proxecto?
Coa pandemia e a difícil situación que se produciu despois dinme conta de que, se nalgún momento a Arca desaparecía, pechaba as súas portas, quería ter algo físico, algo que quedase para poder recordar o que fixemos durante sete anos: facer concertos nunha aldea de menos de 700 veciños.
Non so concertos...
Non. Tamén mercados, exposicións... Visibilizamos o rural.
Pero A Arca da Noe non vai a desaparecer...
Non, ¡de momento non! ¡Eu agardo que non! (Risas) Pero naquel momento foi o que se me pasou pola cabeza. ¡Tamén quería navegar!
Recuperaron xa os concertos?
Si, mais ou menos dende Semana Santa. Temos todas as medidas de seguridade, moita ventilación e aforo para 25 persoas. Durante todo este tempo tamén fixemos actividades de xeito "online".
Como se plantexa o futuro?
Temos pensado empregar o espazo Carabuñas, para público reducido e ao aire libre.