Recuperar a pataca de semente e activar a economía circular son os obxectivos que se marcan conxuntamente o Inorde e a Cámara Municipal de Montalegre. Nunha reunión celebrada este mércores entre o presidente da Cámara, Orlando Alves, e a xerente e o técnico do Centro de Desenvolvemento Agrogandeiro, Emma González e Servando Álvarez, respectivamente, acordouse promover un proxecto piloto sobre o mencionado tipo de tubérculo. No encontro tamén participaron o vicepresidente da Cámara Municipal de Montalegre, David Teixeira, e membros da Cooperativa Agrícola do Barroso.
A vontade da Cámara de Montalegre está a ser a recuperación desta actividade económica e social mediante o apoio e fornecemento da mencionada cooperativa e, tendo en conta a relación do Inorde con esta institución e considerando o papel deste organismo no tecido agrícola da provincia de Ourense, "considerouse convinte a realización de actividades conxuntas para reflotar o cultivo da pataca de semente en Montalegre dende o punto de vista da posibilidade de que a principal comarca produtora de patacas de Galicia, a Limia, con máis de 120.000 toneladas anuais, puidera acceder de xeito vantaxoso a unha pataca de semente de boa calidade e producida a menos de 50 quilómetros", sinalou Emma González. "As relacións do Inorde coa Cámara Municipal de Montalegre son, sen dúbida, moi favorables para ambas partes", engadiu David Teixeira.
