Os edís do grupo municipal popular amosaron esta semana o seu malestar pola "falta de consideración" e polos "malintencionados fallos na comunicación" por parte do goberno local para coa súa formación. "Trócanse os plenos ordinarios do día fixado inicialmente e non se conta coa oposición para elexir as mellores datas, e convócase un pleno extraordinario para cinco minutos despois da comisión pertinente e sen avisar con tempo de antelación, cando os técnicos xa o sabían", quéixanse dende a formación popular. Precisamente, esto último foi o que ocorreu durante a derradeira sesión plenaria celebrada en Xinzo, antes da que a alcaldesa pediu desculpas á oposición.
Sen embargo, o malestar do PP local non se limita soamente ás convocatorias de plenos ordinarios e extraordinarios, senon que se fai extensivo a outros actos de tipo público: "Minutos de silencio, aperturas de cursos ou ciclos, concentracións, convocatorias á veciñanza, reunións, actos ou eventos de todo tipo que organiza ou cos que colabora o Concello de Xinzo". Os concelleiros apuntan a que hai unha "nula comunicación" por parte do departamento que leva directamente Elvira Lama.
"Calquera nova que sae do Concello á prensa tampouco se comunica ao noso grupo", din dende o PP. "Todo isto co anterior goberno non pasaba. As persoas que levaban a comunicación enviaban o mesmo email das notas de prensa e invitacións aos medios e ás portavocías de cada partido, así como tamén aos concelleiros e concelleiras da oposición".
Para os edís populares "non valen as reiteradas peticións de perdón ou desculpas que Elvira Lama dá nos plenos. Pediu perdón no pleno e pola tarde tivo a presentación e inicio do curso de 'O paraugas do Alzheimer' e non avisou novamente".