Os socialistas solicitan á Deputación que procedan á reubicación do paso sobreelevado onde están colocados os redutores mencionados
O PSOE de Xinzo, a través da súa portavoz, Elvira Lama, pide a reubicación "de forma urxente" dos redutores de velocidade que se encontran na OU-112 ao seu paso por Parada de Ribeira. O grupo municipal limiao asegura recoller, deste xeito, "as queixas da veciñanza" xa que din que están cansos de que a intensidade do tráfico e o tránsito de camións de gran tonelaxe perxudiquen o seu descanso e estado dos seus inmobles. "Hai dúas casas, concretamente, situadas a ambas marxes da estrada. Ambas se atopan gravemente danadas e o paso continuo destes vehículos está afectando á súa estrutura", explica a representante local e provincial, Elvira Lama.
Os socialistas solicitan á Deputación que procedan á reubicación do paso sobreelevado onde están colocados os redutores mencionados. Por ese vial teñen que pasar os camións para abastecer ás granxas da zona, polo que reclaman que se sitúen onde non hai casas habitadas.
