Os socialistas instan ao ente local a acometer unha mellora urxente en materia de limpeza e hixiene dos aseos e vestiarios destas instalacións
Elvira Lama, portavoz do grupo municipal socialista de Xinzo, rexistrou o pasado 2 de febreiro unha moción na que se solicita ao Concello que realice diversas melloras nas instalacións deportivas da Moreira, especialmente no campo de fúbol.
Os socialistas instan ao ente local a acometer unha mellora urxente en materia de limpeza e hixiene dos aseos e vestiarios destas instalacións, xa que teñen constancia de queixas sobre o seu estado por parte dos rapaces de Xinzo e dos visitantes.
Os socialistas reclaman que se melloren os accesos ás inmediacións das instalacións deportivas xa que, segundo destaca a súa portavoz, "estas pistas están cheas de fochancas que ameazan con estragar algún vehículo e polas que hai que circular con moita precaución esquivando os buracos".
Na moción presentada, tamén se solicita ao Concello que se estude a posibilidade de implantar un carril bici neste acceso.