As variedades agria e fina, incluidas en Pataca de Galicia

Logo de tres anos de tramitacións, a Comisión Europea vén de publicar a modificación do prego de condicións da Indicación Xeográfica Protexida Pataca de Galicia pola que se inclúen, como variedades amparadas ademais da kennebec de carne branca, a pataca agria -amarela- e a fina de Carballo. Trátase dunha das principais reivindicacións desta entidade e tamén de produtores e envasadores de pataca a prol da que se leva traballando incansablemente durante todo este tempo dende A Limia. Outra das novidades con respecto a este Consello Regulador é que o ámbito territorial da denominación de orixe, que se cinguía exclusivamente a A Coruña, Lugo e Ourense, pasará agora a abarcar toda a comunidade galega. De todo o anterior falou este sábado o presidente da entidade, Guillermo Budiño, despois dunha xuntanza mantida nas oficinas da IXP entre os responsables do organismo. Nela deuse conta de todas estas últimas novidades e comezouse a preparar a vindeira campaña de semente e comercialización 2020/2021, adaptada ás novas medidas de seguridade e á realidade social que se vive con motivo da pandemia. A reunión tivo lugar con todas as prevencións necesarias frente ao covid-19 -ubicaronse, na mesa de xuntanzas, varios separadores de metacrilato para salvagardar a seguridade, entre outras medidas-. Budiño afirmou que, para chegar ata este punto, "atravesouse un proceso longuísimo de tres anos, nos que nos requeriron moitísimos informes. Toda a documentación que presentamos houbo que demostrala posteriormente", dixo o presidente da IXP limiá. "A partir de este momento, os productores e envasadores do resto de Galicia que queiran traballar baixo o selo da denominación tan só terán que solicitalo e cumprir o regulamento. Sendo así será unha pataca moi boa como toda a que se comercializa baixo o noso selo de calidade", engade. Con estas modificacións, a Indicación Xeográfica Protexida pretende incrementar o seu número de produtores inscritos e tamén os quilos comercializados anualmente. Actualmente, os produtores amparados en toda Galicia son, en total, 70, e os envasadores chegan ata os 12 profesionais. Por outra banda, Guillermo Budiño afirmou que, a piques de rematar a campaña de venda 2019/2020, o organismo batiu récords: 6,5 millóns de quilos de tubérculo comercializáronse baixo o selo da denominación de orixe. "Sempre rondabamos os cinco millóns e medio ou seis. Está a piques de finalizar a campaña de venda e chegamos aos seis e medio por primeira vez", manifestou o presidente da IXP. "A pataca kennebec amparada hai dous meses que se agotou, aínda que todavía se está envasando nalgúns casos", engadiu o responsable da entidade. Outro dos cambios na Indicación Xeográfica Protexida -con máis de 35 anos de existencia- foi, tal e como subliñou o seu presidente, a mellora dos procedementos técnicos e de análises. Esto inclúe o perfeccionamento nas análises de terreos e a mellora no control de pragas e rendementos. "Autorizáronnos aumentar a declaración de rendementos no novo regulamento”, puntualizou Guillermo Budiño. A campaña de semente na Limia comezou durante a pasada semana. En total, prevese plantar unha superficie total de 3.500 hectáreas e recoller 130 millóns de quilos en tres meses. Agrimanso vende máis de 100 toneladas Agrimanso S.C., entidad productora de pataca de A Limia, vén de superar a venda de 100 toneladas de tubérculo a través da páxina solotipodesaxudarnos.org en pouco máis dunha semana. Esta plataforma xurdiu, do mesmo que outras na comarca, para tratar de superar a crise actual e dar saída a un "stock" de 600 toneladas motivado pola parálise do mercado ante o peche de locais de restauración. Os responsables da iniciativa que manteñen o lema "se ti nos axudas, nós axudamos" doarán parte do seu excedente a diversas asociacións que o precisen. Ademais, unha persoa particular de A Coruña -que preferiu preservar a súa identidade- solicitou a estes productores 200 quilos de pataca para doar ao Banco de Alimentos Rías Altas. O pedido foi completado con 800 quilos máis por parte de Agrimanso e entregouse á entidade social. A produción véndese a precio de coste e todos os días increméntanse as vendas.