O Concello de Vilar de Santos reeditará, un ano máis, o seu programa de Envellecemento activo con diversas actividades destinadas aos veciños maiores do municipio. O programa comezou a desenvolverse este mércores no Multiusos da Casa Consistorial e repetirase todos os luns, mércores e xoves do ano.
A iniciativa púxose en marcha no 2009 e forma parte do Plan de Igualdade e Benestar impulsado polo goberno local. Neste senso, e segundo sinalou o rexedor, Xan Jardón, "nestes anos de funcionamento do plan fomos introducindo melloras e novidades que teñen posibilitado a participación e dinamización social de mais de 550 veciños, cunha gran influencia na mellora da súa calidade de vida e benestar".
Un dos piares básicos do programa é a actividade de ximnasia activa, que está dirixida por unha fisioterapeuta. Trátase de ximnasia suave adaptada aos maiores e que ten como obxectivo promocionar a autonomía persoal. Busca, do mesmo xeito, mellorar o seu benestar físico e emocional a través de exercicios adecuados a cada un dos participantes.
Ao longo deste ano continuará a actividade de "Saber envellecer", que terá lugar todos os xoves a partir do mes de xaneiro, con obradoiros de ximnasia biosaudable, andainas, memoria en movemento, bailoterapia, relaxación, xerontoximnasia, xogos cooperativos ou psicomotricidade. Os obxectivos serán a prevención da dependencia, o fomento da autonomía persoal e o mantemento da saúde. Os talleres serán impartidos polo equipo interdisciplinario do Centro.